O Liceo Casino de Vilagarcía reúne os requisitos deste tipo de entidades, e leva 105 anos sendo a institución social de referencia en Vilagarcía. É o resultado da fusión do Liceo Marítimo, fundado en 1904 e do Casino de Vilagarcía, fundado en 1902, e da absorción do Club de Mar, fundado en 1954.

Ao mesmo tempo, é unha entidade moderna, en pleno proceso de profesionalización e cun brillante futuro grazas á concesión por parte da Autoridade Portuaria de Vilagarcía das dársenas 2 e 3 e a zona de terra do Cavadelo para construír o novo Porto Deportivo de Vilagarcía e a súa nova sede social, que inclúe piscina, ximnasio, spa, pista de padel, gardaría, salóns sociais e mesmo un pavillón multiúsos.

Esta entidade sen ánimo de lucro naceu cunha clara vocación deportiva, cultural e social, e na actualidade son máis de 1.200 familias as que conforman a súa masa social, procedentes na súa maioría do núcleo urbano da cidade.

As súas instalacións albergan salas de xogos, de conferencias, exposicións, teatro, instalacións náutico-deportivas, almacéns, oficinas, cafetarías... e dan cabida a múltiples actividades deportivas: atletismo, baloncesto, tenis de mesa, piragüismo, vela, pesca; culturais: teatro, exposicións, monicreques, o certame audiovisual máis antigo de Galicia; e sociais: torneos, bailes, etc., sendo, como xa se mencionou, a asociación deportiva e cultural máis activa de cantas operan en Vilagarcía.